Mae aelodau Plaid Cymru yng nghymoedd Rhondda ac Ogwr wedi dewis peiriannydd ifanc o Benrhiwfer i gynrychioli’r blaid yn yr etholiad nesaf i San Steffan.

Owen Cutler (ffotograff uchod) fydd yr ymgeisydd ar gyfer y sedd newydd ac mae e’n gobeithio denu cefnogwyr newydd at Blaid Cymru, yn enwedig o blith pobl sy’n teimlo fod gwleidyddiaeth wedi eu anghofio.

Dywedodd Owen: “Mae’n fraint bod aelodau’r Blaid yn Rhondda ac Ogwr wedi ymddiried ynof i i gyflwyno neges gadarnhaol ein plaid dros gymunedau cryfach a Chymru well.

“Mae cymoedd Rhondda ac Ogwr yn cynnwys cymunedau sydd â’r lefelau tlodi uchaf. Mae gormod o bobl yma sydd wedi profi camwahaniaethu ac allgáu.

“Gwŷr Llafur sydd wedi cynrychioli’r cymoedd hyn ers dros ganrif. Llafur sy’n rheoli’r cyngor ac yn ein cynrychioli ni yn y Senedd. A chanlyniad hyn? Seren aur yn y gynghrair dlodi.

“O’r bobl sy’n cael trafferth ymdopi â’r argyfwng costau byw, yn arbennig y bobl ifanc hynny sy’n methu dod o hyd i gartref teidi na swydd leol, i’r rheiny sy’n mynd i ddyled er mwyn derbyn addysg – mae cymaint o bobl yn teimlo’u bod yn cael eu hanwybyddu a’u gadael ar ôl gan y sefydliad gwleidyddol.

“Fel rhywun sydd wedi byw mewn tŷ cyngor, a rhywun sy’n deall gwerth prydau ysgol am ddim, rwy’n ymwybodol pa mor anodd gall bywyd bod dydd fod. Does dim digon o’r bobl sy’n penderfyniadau ar ein rhan yn dod o gefndiroedd tebyg i ni.”

Yn ei araith i aelodau Plaid Cymru, fe dalodd Owen deyrnged i’w dadcu a fu’n gyfrifol am ennyn ei ddiddordeb cynnar mewn gwleidyddiaeth. “Fe fyddai’n adrodd hanesion i mi am streic y glowyr, ac am ddigwyddiadau o orffennol y Rhondda fel terfysgoedd Tonypandy – mae’n hynod bwysig i ni ddeall ein gorffennol os ydym am greu dyfodol gwell.”

Gan siarad wedi’r cyfarfod dewis yng Nghlwb Rygbi Ystrad Rhondda, dywedodd Owen: “Rydw i am i’n hymgyrch ganolbwyntio ar yr argyfwng costau byw ac ar ddyfodol gwyrdd gyda chyfleoedd am swyddi da, ac rydw i hefyd eisiau tynnu sylw at y setliad ariannol annheg mae Cymru’n ei dderbyn gan San Steffan. Ryn ni wedi cael ein twyllo’n rhacs gan HS2 ac fe allai’r biliynau sy’n ddyledus i ni gael eu buddsoddi yn yr economi ac yn y gwasanaethau iechyd. Rydw i hefyd eisiau helpu pobl i ailgysylltu â gwleidyddiaeth. Gyda’r fath lygredd a chymaint o wleidyddion ynghlwm â sgandalau cyllid ac yn elwa’n ariannol o’u swyddi – o Brif Weinidog newydd Cymru i ASau di-ri yn San Steffan – mae gwir angen sefyll yn gadarn yn erbyn llygredd gwleidyddol os ydyn ni am ail-adeiladu’n democratiaeth fregus. Mae adroddiad diweddar y Comisiwn ar yr opsiynau cyfansoddiadol i Gymru yn y dyfodol yn glir iawn am yr argyfwng sy’n wynebu ein democratiaeth. Gall pob unigolyn sydd â phleidlais sefyll dros ddemocratiaeth a dyfodol gwell i’r cymoedd drwy bleidleisio dros Blaid Cymru yn yr etholiad hwn.”

Mae Owen wedi ennill cefnogaeth cyn-Aelod Senedd y Rhondda, Leanne Wood, a ddywedodd: “Mae Owen yn ddeallus, yn feddylgar ac yn garedig ac rwy’n falch i gynnig fy nghefnogaeth iddo. Bydd yn wir gaffaeliad – yn llais ac yn eiriolwr dros bobl Rhondda ac Ogwr – ac rwy’n edrych ymlaen at weithio gydag e i godi llais dros rheiny sy’n cael trafferth ymdopi.”

I gysylltu ag Owen defnyddiwch y ffurflen isod.